កិច្ចប្រជុំជាមួយម្ចាស់រោងម៉ាស៊ីនកិនស្រូវ ក្រុមហ៊ុននាំចេញអង្ករ ប្រចាំខេត្តពោធិ៍សាត់ បាត់ដំបង និងបន្ទាយមានជ័យ

សភាពាណិជ្ជកម្ម ខេត្តបាត់ដំបង :​ រសៀល​ ថ្ងៃទី២៤ ខែមិថុនា ឆ្នាំ២០២៣ ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកនៃធនាគារអភិវឌ្ឍន៍ជនបទ និងកសិកម្ម បានអញ្ជើញចូលរួមជាអធិបតីភាពក្នុងកិច្ចប្រជុំជាមួយម្ចាស់រោងម៉ាស៊ីន ក្រុមហ៊ុននាំចេញអង្ករ ដែលអញ្ជើញមកពីខេត្តពោធិ៍សាត់​ បាត់ដំបង និងខេត្តបន្ទាយមានជ័យ។

យកឱកាសនៃកិច្ចប្រជុំនេះ, ឯកឧត្តមបណ្ឌិត បានស្នើសុំ និងជម្រាបជូនដល់ម្ចាស់រោងម៉ាស៊ីនទាំងអស់ដែលមានវត្តមាន ថា៖

1. សម្រាប់រដូវប្រមូលផលស្រូវដែលនឹងមកដល់ ខាងមុខ ឯកឧត្តមបណ្ឌិត សូមធ្វើការស្នើសុំ និងបន្តជំរុញលើកទឹកចិត្តដល់ម្ចាស់រោងម៉ាស៊ីនកិនស្រូវទាំងអស់ មេត្តាជួយទិញស្រូវពីកសិករអោយអស់ពីលទ្ធភាពក្នុងតំលៃទីផ្សារ។ ឯកឧត្តមបណ្ឌិត សង្ឃឹមយ៉ាងមុតមាំថា ម្ចាស់រោងម៉ាស៊ីនទាំងអស់នឹងធ្វើការសហការគ្នា ដោយសាមគ្គីភាព ដើម្បីលើកស្ទួយជីវភាពកសិករ និងជំរុញអោយផែនការនាំចេញអង្ករ​១លានតោន​របស់រាជរដ្ឋាភិបាល ទទួលបានជោគជ័យ។ ជាមួយគ្នានេះ ឯកឧត្តមប្រតិភូ បានជម្រាបជូនម្ចាស់រោងម៉ាស៊ីនបន្ថែមទៀតថា ដោយទទួលបានការទុកចិត្តពីរាជរដ្ឋាភិបាល ធនាគារអភិវឌ្ឍន៍ជនបទ និងកសិកម្ម នៅតែបន្តផ្តល់ឥណទានដល់ម្ចាស់រោងម៉ាស៊ីនធ្វើការប្រមូលទិញស្រូវពីកសិករក្នុងរដូវប្រមូលផលខាងមុខនេះ។

2. សម្រាប់រដូវប្រមូលផលស្រូវ ឯកឧត្តមបណ្ឌិត ស្នើ​សុំ​ម្ចាស់រោងម៉ាស៊ីនកិនស្រូវ​ រៀបចំ​បង្កើត​ទីផ្សារ​ទិញ​ស្រូវ​ក្នុង​តំបន់​របស់ខ្លួន​ អោយបានច្រេីន​កន្លែង​ និងច្រើនទីតាំង ដេីម្បីបង្ករភាពងាយស្រួលដល់ប្រជាកសិករធ្វើការប្រមូលផ្តុំ យកស្រូវមកលក់​ និងកាត់បន្ថយការចំណាយថ្លៃដឹកជញ្ជូនរបស់បងប្អូនកសិករផងដែរ។

3. ឯកឧត្តមបណ្ឌិត ស្នើសុំដល់តំណាងអ្នកទិញស្រូវរបស់រោងម៉ាស៊ីន ដោយធ្វើការទូទាត់ប្រាក់នៃការទិញ-លក់ស្រូវពីបងប្អូនកសិករ តាមរយៈ​ APP របស់ធនាគារ ARDB ដែលអាចផ្ទេរទៅធនាគារផ្សេងៗបានយ៉ាងងាយស្រួល និងរហ័ស។ ក្នុងន័យនេះ , ឯកឧត្តមបណ្ឌិត លើកទឹកចិត្តអោយម្ចាស់រោងម៉ាស៊ីនទាំងអស់នៅពេលខ្វះថវិកាទិញស្រូវ អាចធ្វើការស្នើសុំឥណទានបន្ថែម​ ពីធនាគារអភិវឌ្ឍន៍ជនបទ និងកសិកម្មបាន គ្រាន់តែបំពេញតាមលក្ខខណ្ឌគុណវុឌ្ឍរបស់ធនាគារតែប៉ណ្ណោះ​ ឬក៏ដាក់ស្តុកស្រូវ-អង្ករ​ ជាទ្រព្យធានា​។ ឯកឧត្តមបណ្ឌិតបានធ្វើការ ស្នើសុំដ៏ទទូចដល់ម្ចាស់រោងម៉ាស៊ីនទាំងអស់សូមមានអោយមានសាមគ្គីភាពរវាងគ្នា កុំធ្វើការប្រកួតប្រជែងគ្នា និងសូមធ្វើការរួបរួមគ្នាដើម្បីលើកស្ទួយវិស័យស្រូវអង្ករកម្ពុជាប្រកបដោយវិបុលភាព និងភាពរីកចម្រើន។

4. ស្នើ​សុំ​ម្ចាស់​រោង​ម៉ាស៊ីន​កិន​ស្រូវ​ទាំងអស់​សូមមេត្តា​ជួយ​សម្រួល​ និងអនុញ្ញាត ដល់​បងប្អូន​ប្រជាពលរដ្ឋ​ ដែលជាកម្មកររបស់ខ្លួន​ បានចេញទៅបោះឆ្នោតជ្រើសតំាងតំណាងរាស្រ្ត នៅថ្ងៃអាទិត្យ ទី២៣ ខែកក្កដា ឆ្នាំ២០២៣ ខាងមុខនេះឱ្យបានគ្រប់ៗគ្នាកុំបីខាន។

5. ក្រោយ​ពីបញ្ចប់ការប្រជុំនេះ​ ឯកឧត្ដម​បណ្ឌិត​បានបន្តបេសកកម្មចុះត្រួតពិនិត្យមើលការប្រើប្រាស់ឥណទានក្រោមគម្រោងហិរញ្ញប្បទានពិសេសរបស់រាជរដ្ឋាភិបាលដើម្បីធានាស្ថេរភាពថ្លៃស្រូវ​ ដែលបានផ្តល់ជូនតាមរយៈ ធនាគារអភិវឌ្ឍន៍ជនបទ និងកសិកម្ម នៅទីតាំងរោងម៉ាស៊ីនកិនស្រូវ និងក្រុមហ៊ុន ចំនួន​ ៥ ក្នុងភូមិសាស្ត្រស្រុកមោងឬស្សី ខេត្តបាត់ដំបង​ និងបន្ទាយមានជ័យ៖

• ធនាគារស្រូវកម្ពុជា​

• រោងម៉ាស៊ីនកិនស្រូវ ភួ ប៉ូយ

• រោងម៉ាស៊ីនកិនស្រូវ ឡាយ សែ

• រោងម៉ាស៊ីនកិនស្រូវ ហ្វាង លី

• និងរោងម៉ាស៊ីនកិនស្រូវ ស៊ីវ ឡាយ ៕