ឯកឧត្តមបណ្ឌិត កៅ ថាច ចូលរួមកម្មវិធីសំណេះសំណាលជាមួយសិស្សានុសិស្ស នៅវិទ្យាល័យខ្សាច់កណ្តាល

វិទ្យាល័យហ៊ុន សែន រ៉ូតា ខ្សាច់កណ្តាល៖ រសៀលថ្ងៃចន្ទ ទី៣១ ខែតុលា ឆ្នាំ២០២២ វេលាម៉ោង ១៥ និង ០០ នាទី , ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកនៃធនាគារអភិវឌ្ឍន៍ជនបទ និងកសិកម្ម រួមជាមួយអនុប្រធាន និងសហការី បានចូលរួមកម្មវិធីសំណេះសំណាលជាមួយលោកនាយក នាយករង លោកគ្រូអ្នកគ្រូ និងសិស្សានុសិស្សថ្នាក់ទី១២ នៃវិទ្យាល័យ ហ៊ុន សែន រ៉ូតាខ្សាច់កណ្តាល ដែលត្រៀមប្រឡងសញ្ញាបត្រមធ្យមសិក្សាទុតិយភូមិ ដែលមានវត្តមានចូលរួមសរុប ៣១៦ នាក់។

ក្នុងឱកាសនោះ ឯកឧត្តមបណ្ឌិត កៅ ថាច បានពាំនាំប្រសាសន៍ផ្តាំផ្ញើសួរសុខទុក្ខ និងការនឹករលឹកដ៏ជ្រាលជ្រៅពីសំណាក់ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ជូនដល់ប្អូនៗសិស្សានុសិស្ស និងលោកគ្រូអ្នកគ្រូទាំងអស់។ ឆ្លៀតក្នុងឱកាសនោះ ឯកឧត្តមបណ្ឌិត បានណែនាំ និងផ្តាំផ្ញើដល់ប្អូនៗសិស្សានុសិស្សឱ្យខិតខំសិក្សារៀនសូត្រ និងត្រៀមលក្ខណៈសម្បត្តិ សម្រាប់ប្រឡងសញ្ញាបត្រមធ្យមសិក្សាទុតិយភូមិ ដែលនឹងប្រព្រឹត្តទៅនៅថ្ងៃទី៥ ខែធ្នូ ឆ្នាំ២០២២ ខាងមុខនេះ ឱ្យទទួលបាននូវលទ្ធផលល្អប្រសើរ គឺជាប់ឱ្យបានច្រើន តាមទិសស្លោក “អ្នកចេះគឺជាប់” ព្រមទាំងណែនាំប្អូនៗឱ្យចៀសឆ្ងាយពីគ្រឿងញៀន និងអំពើអបាយមុខគ្រប់ប្រភេទ។

ចុងបញ្ចប់ ឯកឧត្តមបណ្ឌិត កៅ ថាច បានឧបត្ថម្ភថវិកាមួយចំនួន ដ៏ថ្លៃថ្លារបស់ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ជូន ដល់លោកគ្រូអ្នកគ្រូបង្រៀនបំប៉នសិស្សថ្នាក់ទី១២នៅវិទ្យាល័យហ៊ុន សែន រ៉ូតា ,ជូនដល់សិស្សានុសិស្ស និងឧបត្ថម្ភដល់សាលាសម្រាប់ការរៀបចំកម្មវិធីផងដែរ។