កម្មវិធីសំណេះសំណាលជាមួយកសិករដាំដុះស្វាយចន្ទី​ ទុរេន​ ស្វាយ​ ស្រូវ​ ចិញ្ចឹម​សត្វ​ និង​ដំណាំ​ហូបផ្លែ​ ផ្សេង​ៗ​ទៀត​ និងផ្សព្វផ្សាយគោលការណ៍ឥណទានគាំទ្រដល់ខ្សែច្រវាក់ផលិតកម្មដាំណាំស្វាយចន្ទី

គោលបំណងនៃកម្មវិធីសំណេះសំណាលនេះ គឺ

1. ដេីម្បីផ្សព្វផ្សាយអំពីផែនការ​ និង​គោល​នយោបាយ​របស់រាជរដ្ឋាភិបាល​ ដែលចង់ក្លាយជា​ អធិរាជ​ស្វាយចន្ទី​ នាពេល​អនាគត​ ។

2. ស្វែងយល់ពីផលវិបាក ផ្សេងៗ ដែលបងប្អូនកំពុងជួបប្រឈម ក្នុងការប្រកបផលរបរកសិកម្ម និង អនុញ្ញាតអោយលើកអំពីសំណូមពរ មកធនាគារ ARDB ។

3. ធ្វើការណែនាំអោយបងប្អូនផ្លាស់ប្តូរផ្នត់គំនិតកែប្រែពីការធ្វើកសិកម្មចិញ្ជឹមឆ្នាំងបាយ អោយក្លាយជាការធ្វើកសិកម្មបែបទំនេីបដែលមានលទ្ធភាពធ្វើការផ្គត់ផ្គង់ដល់ទីផ្សារ បន្ថែមពីលើការផ្គត់ផ្គង់ក្នុងគ្រួសារ។

4. ណែនាំដល់បងប្អូនកសិករ គួរចេះតាមដានតំលៃកសិផលនៅលើទីផ្សារ និងត្រូវចេះតាមដានព័ត៍មានព្យាករណ៍អាកាសធាតុ។ ត្រូវចេះជ្រើសរើសដំណាំដាំតាមរដូវកាល​ ដោយបងប្អូនអាចធ្វើការសិក្សារៀនសូត្របន្ថែម ជាពិសេសក្នុងបរិបទសម័យទំនើបនេះ បងប្អូនអាចរៀនបានតាមរយៈ បណ្ដាញ​សង្គម​ និងយូធូប​(Youtube) ជាដើម ដើម្បីទទួលបានចំណេះដឹងបន្ថែម។

5. ណែនាំអោយបងប្អូនចេះកែប្រែដំណាំ និងកែប្រែដី ដើម្បីអោយការដាំដុះទទួលបានទិន្នផលខ្ពស់។ ណាមួយកុំទុកដីទំនេរចោល គួររកដំណាំប្រភេទណា ដែលអាចអោយយើងដាំដុះរយៈពេលខ្លី ប៉ុន្តែមានទីផ្សារ និងមានតម្រូវការ​ ដែលជួយ​កែប្រែដីកុំអោយខូច​ ឬអន់ថយគុណភាព។

6. ណែនាំ អោយបងប្អូនកែប្រែទម្លាប់ ពីការដាំដុះដំណាំតែមួយមុខ អោយ ឆ្លៀតចញ្ចឹមសត្វបន្ថែម ដើម្បីទទួលបានចំណូលបន្ថែម។

7. លើកទឹកចិត្តដល់បងប្អូនចងក្រងគ្នាជាសហគមន៍កសិកម្ម ឬបណ្តុំផលិតស្វាយចន្ទី​ ទុរេន​ និងដំណាំរួមផ្សំ​ផ្សេងៗទៀត ដោយត្រូវរៀបចំនូវ​ ផែនការណ៍ដាំដុះ, រៀបចំផែនការចិញ្ចឹម ផែនការប្រមូលផល ក៏ដូច​ជាផ្សារភ្ជាប់ជាមួយទីផ្សារ​ ដើម្បីមានលទ្ធភាពផ្គត់ផ្គង់តាមតម្រូវការទីផ្សារ​ ក្នុង​តម្លៃ​សមរម្យ​។ ការណ៍នេះសំខាន់ណាស់ , បើបងប្អូនអាចធ្វើបាននោះបងប្អូនពិតជាទទួលបាន ផលចំណេញច្រើន និងមានចំណូលចូលគ្រួសារ។

8. លើកទឹកចិត្តដល់បងប្អូន ក្នុងករណីបងប្អូន ​ប្រជាកសិករ​ ឬបណ្តុំផលិត​ ណាម្នាក់ចង់បានឥណទាន​ ដើម្បីពង្រីកការដាំដុះ ឬពង្រីកខ្សែច្រវាក់ផលិតកម្មស្វាយចន្ទី បងប្អូនអាចស្នើសុំឥណទានពីធនាគារ​ ARDB​ បានក្នុង​អត្រា​ការប្រាក់​សមរម្យ​ និងអាចយកស្តុកគ្រាប់ស្វាយចន្ទីជាទ្រព្យធានា​ អាច​ទទួល​បាន​រហូតដល់​ ៧០%​ នៃតម្លៃ​គ្រាប់ស្វាយចន្ទីសរុប។

9. ចុងបញ្ចប់, ឯកឧត្ដម​បណ្ឌិត​ ក៏បានសំណូមពរដល់ប្រជាកសិករទាំអស់​ គួរសិក្សាពីបច្ចេកទេសឱ្យច្បាស់លាស់លើការដាំដុះ ការថែទាំ ដើម្បីបង្កើនការផលិត និងការកែច្នៃ ឲ្យស្របតាមសង់ដារចំណីអាហារ ដើម្បីលក់ទៅទីផ្សារផងដែរ​ នៅ​ពេល​ទទួល​បាន​ឥណទាន​ពីធនាគារ ARDB។

10. បន្ថែមលើនេះ ឯកឧត្តមបណ្ឌិត កៅ ថាច ក៏បានអំពាវនាវផងដែរ ដល់បងប្អូនប្រជាពលរដ្ឋ ដែលមានសិទ្ធិបោះឆ្នោត សូមអញ្ជើញទៅបោះឆ្នោតជ្រើស តំាងតំណាងរាស្រ្ត នៅថ្ងៃអាទិត្យ ទី២៣ ខែកក្កដា ឆ្នាំ២០២៣ ខាងមុខនេះឱ្យបានគ្រប់ៗគ្នាកុំបីខាន៕