ឯកឧត្តមបណ្ឌិត កៅ ថាច និងសហការីអញ្ជើញពិនិត្យមើលកសិដ្ឋានចិញ្ចឹមត្រី លោក ជា សុភិន នៅស្រុកថ្មពួក ខេត្តបន្ទាយមានជ័យ

បន្ទាយមានជ័យ : ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកនៃធនាគារអភិវឌ្ឍន៍ជនបទ និងកសិកម្ម ព្រមទាំងសហការី នៅរសៀលថ្ងៃទី២៦ ខែមីនា ឆ្នាំ២០២៥នេះ បានអញ្ជើញចុះពិនិត្យមើលកសិដ្ឋានចិញ្ចឹមត្រីមួយកន្លែងរបស់ លោក ជា សុភិន ដែលមានទីតាំងស្ថិតនៅស្រុកថ្មពួក ខេត្តបន្ទាយមានជ័យ។

នៅក្នុងឱកាសការអញ្ជើញចុះពិនិត្យផ្ទាល់នៅ កសិដ្ឋានចិញ្ចឹមត្រី របស់ លោក ជា សុភិន ឯកឧត្តមបណ្ឌិតប្រតិភូ បានសម្តែងការកោតសរសេរលើការខិតខំប្រឹងប្រែងក្នុងការចិញ្ចឹមត្រីនិងបង្កាត់ពូជ ភ្ញាស់កូនត្រីធម្មជាតិជាច្រើនប្រភេទ សម្រាប់យកទៅចែកចាយ និងផ្គត់ផ្គង់ទីផ្សារដែលកំពុងមានតម្រូវការខ្ពស់ផងដែរ។

កសិដ្ឋានចិញ្ចឹមត្រីរបស់ លោក ជា សុភិន គឺ បង្កើតឡើងចាប់ពីឆ្នាំ១៩៩៥ ជាលក្ខណៈខ្នាតតូច ប៉ុន្តែក្រោយមកបានពង្រីកជាបន្តបន្ទាប់ រហូតដល់៥០ស្រះតូចៗនិងស្រះធំចំនួន៤ ដែលកំពុងតែចិញ្ចឹមត្រី និងភ្ញាស់កូនត្រី ជាច្រើនប្រភេទ ត្រីដង្អោន ត្រីឆ្លាំង ត្រីកេស ត្រីរស និងត្រីអណ្ដែងផង។

យោងតាមម្ចាស់កសិដ្ឋានខាងលើបញ្ជាក់ថា បន្ទាប់ពីទទួលបានការគាំទ្រពីអតិថិជនគឺមានការរីកចម្រើនលើវិស័យវារីវប្បកម្មចិញ្ចឹមត្រីជាបន្តបន្ទាប់ហើយតាមផែនការគ្រោងនឹងពង្រីកកសិដ្ឋានបន្ថែមទៀត ដើម្បីផ្គត់ផ្គង់ទៅតាមតម្រូវការទីផ្សារក្នុងស្រុកផងដែរ។

បន្ថែមពីនេះ ក្នុងថ្ងៃដដែលនោះ ឯកឧត្តមបណ្ឌិត កៅ ថាច ក៏បានអញ្ជើញចុះសាកសួរសុខទុក្ខ និងសំណេះសំណាលជាមួយបងប្អូនកសិករជាបណ្ដុំសមាគមចិញ្ចឹមត្រី ស្ថិតនៅឃុំព្រះនេត្រព្រះ ស្រុកព្រះនេត្រព្រះ ខេត្តបន្ទាយមានជ័យ ដែលមានសមាជិកជាអ្នកចិញ្ចឹមត្រីប្រមាណ ១០០គ្រួសារ។

ជាមួយនិងការស្តាប់មតិលើកឡើងពីតម្រូវការត្រីផ្គត់ផ្គង់ក្នុងស្រុកច្រើន និងពូជត្រីដែលបង្កាត់ និងភ្ញាស់បែបធម្មជាតិ កំពុងមានតម្រូវការខ្ពស់ ឯកឧត្ដមបណ្ឌិត កៅ ថាច បានផ្តល់មតិឲ្យបងប្អូនត្រូវចងក្រងជាសហគមន៍ រួចរួមគ្នាចិញ្ចឹមឆ្លាស់ដៃគ្នាតាមប្រភេទពូជត្រីដែលមានទីផ្សារ ហើយបើសិនជាបងប្អូនមានតម្រូវការឥណទានដែលមានអត្រាការប្រាក់ទាប ធនាគារ ARDB នឹងស្វាគមន៍ ចំពោះបងប្អូនមកពីគ្រប់មជ្ឍដ្ឋាន មានបំណងចង់ចាប់មុខរបរចិញ្ចឹមត្រី និងចិញ្ចឹមសត្វជាដើម។